प्रवास

अष्ट्रेलियाको अध्यागमन नियम अझ कडा हुँदै

- नारायण खड्का, अष्ट्रेलिया

मंसिर ९, २०७४-अष्ट्रेलियाले आफ्नो अध्यागमन नियमलाई अझ कडा बनाएको छ । 

पछिल्लो समयमा आप्रवासी नियमप्रति कठोर बन्दै गएको अष्ट्रेलियाले मुख्य रुपमा अस्थायी भिषाको पहिलेको नियमलाई अझ कडा रुपमा परिमार्जन गरेको हो ।  

अस्थायी भिषामा आउने र आएकाहरुलाई लक्षित गरेर परिमार्जन गरिएको नयाँ नियममा १० वर्षसम्म अष्ट्रेलिया प्रवेशमा रोक लगाउने र भिषा रद्द गरेर फिर्ता पठाउनेसम्मका प्रावधान थपिएको छ । 

नक्कली कागजपत्र बनाएर अष्ट्ेरेलियाको भिषा लिएको पाइएमा उक्त ब्यक्तिलाई १० वर्षसम्म प्रवेशमा रोक लगाइने भएको छ । जसमा उक्त भिषा आवेदन गर्दा समावेश गरिएका परिवारका सदस्यहरुलाई पनि १० बर्षसम्मै प्रवेशमा रोक लगाइनेछ ।

यही महिनाको १८ तारिखदेखि लागू गरिएको यो नयाँ परिमार्जित नियममा यसपहिले भने ३ वर्षसम्म मात्र प्रतिबन्ध लगाइने उल्लेख थियो । अध्यागमनको क्षेत्रमा काम गरिरहेकाहरुका अनुसार अष्ट्रेलियाले सही, योग्य र सक्षम ब्यक्तिलाई मात्र अष्ट्रेलिया भित्र्याउने उद्देश्यका साथ यो नियमलाई परिमार्जन गरेको हो ।

यसैगरि, समाजिक सञ्जाल तथा अनलाईनहरुमा सामाजिक द्वेष फेलाउने प्रकृतिका सन्देशहरु प्रवाह गरेको पाइएमा त्यस्ता ब्यक्तिको पनि भिषा रद्द गरी स्वेदश फिर्ता पठाइने भएको छ । यदी कसैलाई नोक्सानी पुर्‍याउने, धम्की दिने किसिमको सन्देश पाएको प्रमाणित भएमा अष्ट्रेलियाका अध्यागमन मन्त्रीले उक्त ब्यक्तिको भिषा रद्द गर्न सक्नेछन् । 

सरकारी तथ्यांक अनुसार सन् २०१६ देखि जुलाई २०१७ सम्म ४७ हजारको भिषा रद्द गरिएको छ । यसपहिले यि नियमहरु केही अस्थायी भिषालाई मात्र लागु हुने उल्लेख भएकोमा अहिले प्राय सबै अस्थायी भिषा आवेदक र भिषावाहकलाई लागू हुने समेत जनाइएको छ । 

बिज्ञहरुका अनुसार नक्कली विवाह, नक्कली आर्थिक स्रोतलगायतका नक्कली कागजपत्र बनाएर बिद्यार्थी भिषामा आउनेहरुलाई थप निरुत्साहित गर्नका लागि ३ वर्षको प्रतिबन्धलाई १० वर्ष बनाइएको हो । 

एकपटक भिषा रद्द भएर प्रतिबन्ध लागिसकेपछि फेरि यहाँ आउन पहिलोपटकको जस्तो सहज नहुने भएकाले समेत सक्कली र वास्तविक कागजपत्र र प्रमाणहरुका साथ मात्र आउन उनीहरुको सल्लाह छ ।

 

प्रकाशित: मंसिर ९, २०७४

अर्को समाचार

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्

मुख्य समाचार