मनोरञ्जन

राहतमा जुटे निश्चल–आशिफ

- कान्तिपुर संवाददाता , काठमाडौं

श्रावण ३२, २०७४-तराईका बाढी पीडितका लागि फिल्मकर्मीद्वय निश्चल बस्नेत र आसिफ शाहले राहतको अभियान थालेका छन् । दुवैले ५०–५० हजार रुपैयाँ सहयोग रकमबाट सुरु गरिएको उक्त अभियानमा सर्वसाधारणले समेत मोबाइल र इन्टरनेटमार्फत गच्छेअनुसार सहयोग गर्न सक्ने बनाइएको छ । जसका लागि ई–सेवाले सहकार्य गरेको छ । ई–सेवाले पनि कर्मचारीकोसमेत गरी साढे तीन लाख रुपैयाँ अभियानमा सहयोग गरेको जनाएको छ ।

तराई क्षेत्रमा अविरल वर्षापछि आएको बाढीले अधिकांश क्षेत्र डुबानमा परेपछि बासस्थान र खानपानको अभाव देखिएको छ । निश्चलको ब्ल्याक हर्स पिक्चर्स र आशिफको जीटू वान पिक्चर्स कम्पनीमार्फत उक्त सहयोग अभियानको थालनी गरेका हुन् । 

अभियानबारे निश्चलले भने, ‘अहिले सकेसम्म तराईमा नै पुगेर सहयोग गर्नु ठूलो हो । तर त्यहाँ पुग्न नसकिएको खण्डमा पनि यस अभियानले घर–घरबाट सहयोग गर्न चाहनेलाई सजिलो बनाइदिन सक्छ ।’ अभियानबाट उठेको रकम सबै नै पीडितका लागि प्रदान गरिने आशिफले बताए । उनले उठाइएको रकम ई–सेवाको डोनेसन खण्डमा समेत हेर्न सकिने उल्लेख गरे । फिल्म ‘२ रुपैयाँ’ का कलाकारद्वय निश्चल र आशिफको जुगलबन्दी राहत अभियानमा समेत देखिएको हो ।

प्रकाशित: श्रावण ३२, २०७४

अर्को समाचार

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्

मुख्य समाचार