विश्व

'हामी सबै चार्ली हौं'

हग स्कोफिल्ड, बीबीसी न्युज
 'हामी सबै चार्ली हौं'

पुस २५, २०७१-कहिल्यै बिर्साउनै नसकिने अहिले यस्तै एक दिनको फ्रान्सले सामना गरिरहेको छ । मुलुकले पहिले पनि आतंकवाद अनुभव गरेकै हो ।

सन् १९७०, ८० र ९० मा मध्यपूर्वसँग सम्बन्धित विस्फोटहरूको यहाँ लहर चल्यो । तीन वर्षअघि युवा मोहम्मद मेराले त्यहाँ थुप्रैको हत्या गरे । तर आधा शताब्दीको अवधिमा एउटै पनि यस्तो बर्बरतापूर्ण आक्रमण भएन । सिरियामा होइन, मध्य पेरिसको परिचित गल्लीहरूमा एक इस्लामिक बन्धुकधारीले एक स्थानीय प्रहरीलाई मारेको देखेपछि जनताले आफ्नो जीवनबारे फरक ढंगले विचार गरिरहेका छन् । हत्याराको कठोर आत्मविश्वास, उनीहरूको पेसेवर हतियार र आफूसँगै हुर्के बढेकाप्रति उनीहरूको पूर्ण अपमानजनक व्यवहारले फ्रान्समा अहिले डरलाग्दो खतरा महसुस भएको छ ।

फरार हुनलाई मार्ग प्रशस्त गर्ने क्रममा आक्रमणपछि दुई नकाबपोस कारतिर गइरहेको गतिविधि देखाउने सार्वजनिक भएको भिडियो तस्बिर सम्भवतः निकै विचलित बनाउने खालको छ । उनीहरू भागिरहेका छैनन् । कुनै डर छैन । उनीहरू हिँडिरहेका छन् । ती तस्बिरहरूले फ्रान्समा कायम खतराको बारेमा विस्तारपूर्वक बोल्छ । उनीहरू अपरिचित हत्यारा हुन् । उनीहरू कुनै अर्को संसारका छन् ।

केही चर्चित व्यक्तित्वहरूलाई अचानक गुमाउनु फ्रान्सेलीका लागि ठूलो

झट्का हो । स्वतन्त्रताको वास्तविक अर्थ बुझाउने कार्टुननिस्ट बोलिन्स्की र काबु दशकौंसम्म हाम्रो वरिपरि रहे । उनीहरूको कार्य साप्ताहिक व्यंग्य पत्रिका 'चार्ली हेब्डो' मा मात्र नभएर मुख्यधारका प्रकाशनहरू 'लिबरेसन' र 'ले मोन्डे' मा पनि छाइरह्यो । जनतालाई उनीहरूको नाम थाहा नभए पनि उनीहरूका शैलीलाई भन्ने तत्कालै पछयाउँथे ।

यो नवयुग आतंकको ती पहिला पीडितहरू फ्रान्सको वाम पक्षीय सांस्कृतिक सहमतिका आदर्श बन्नुले निकै सांकेतिक महत्त्व राख्छ । सन् १९६० र ७० तिर प्रकट भएका काबु र बोलिन्स्कीले काम गर्ने पत्रिकाले स्वतन्त्र अभिव्यक्तिको कुनै सीमा नहुने मान्यता राखेको थियो । यो मिथ्या आशाले आज पीडा निम्त्यायो । मृत्युबाट स्तब्ध भएका एक साथीले फ्रान्स इन्फो रेडियोसँग काबुको गैरफौजी वा भद्र चरित्रको सम्झना गरे । कुनै पनि आतंकको विरुद्ध सुरक्षाको उनी विरोधी थिए । उनी खुल्ला बाँच्न चाहन्थे । यी सबबीच अचानक भएको आक्रमणले राष्ट्रिय एकताको अभिव्यक्ति दिनेछ । राजधानी पेरिस र अन्य सहरहरूमा बुधबारदेखि प्रदर्शनहरू सुरु भइसकेको छ । 'अब हामी सबै चार्ली हौं,' उनीहरू भनिरहेका छन् । पत्रकारहरूलाई यसको लक्ष्य बनाइएको हुनाले यसले समाजलाई गहिरो घाउ दिएको छ । विश्वप्रतिको आफ्नो भूमिकालाई फ्रान्सले गम्भीरतापूर्वक लिन्छ । चार्ली हेब्डोजस्ता पत्रिकाहरू निकै असमान प्रकृतिका हुन्छन् । उनीहरूको कार्टुन रमाइलोभन्दा आक्रमक खालका हुन्छन् । बोल्नै नमिल्ने कुराहरू पनि अझैं फ्रान्समा व्यक्त गर्न सकिने कार्टुनहरूले सन्देश दिन्छन् । आज, हरेकले फ्रान्सको साझा सुरक्षा मान्यताहरूलाई साझेदारी गर्न सक्छन् । पेरिस मस्जिदका मौलानादेखि राष्ट्रिय मोर्चाकी मारिन ल पेनसम्म एकै थलोमा उभेका छन् । यो एकता कहिलेसम्म कायम रहने हो भन्ने अर्को प्रश्न छ । चाँडै त्यहाँ मतभेदका स्वरहरू सुनिने छन् । यो आक्रमणको मुख्य पाठ भनेको बालिक सहरहरूमा इस्लामवादप्रति अपनाएको निश्छलतालाई फ्रान्सले त्याग्नुपर्छ भन्नेहरू पनि हुनेछन् । केही असमान्य स्वभावका व्यक्तिहरूलाई छाडेर मुलुकले एकताको ढोंग रच्न नहुने भन्नेहरू पनि छन् । मुस्लिम धर्मभित्रै समस्या भएको देखाउन नहुने चेतावनी दिनेहरू पनि छन् । सबै मुख्य समस्याबाट उम्कने दाउमा पनि हुनेछन् ।

फ्रान्सका सम्मानित उपन्यासकार माइकल हाउलबेकको नयाँ उपन्यासको प्रकाशनकै दिन यी हत्याहरू भएकाले यसको सांकेतिक महत्त्व पनि छ । उनको नयाँ उपन्यासमा एक मुस्लिम राष्ट्रपतिले सन् २०२२ मा फ्रान्सलाई नियन्त्रणमा लिएको र सबैले यसलाई स्विकारेको कल्पना गरिएको छ । योचाँहि १८ शताब्दीदेखि पश्चिमा व्याप्त ज्ञानविज्ञानको मान्यताहरूको अन्त्य हुने विषयमा आधारित भएको उनले अन्तर्वार्ताहरूमा भनेका छन् ।

प्रकाशित: पुस २५, २०७१

अर्को समाचार

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्

मुख्य समाचार